Diyosezi Gatolika ya Kabgayi yatangije ishuri rizajya ryigisha abakiri bato umuziki mu rwego rwo guteza imbere impano zabo no kuzikuza.
Ni ishuri ryiswe Kabgayi Music School ryatashywe kuri uyu wa Gatatu tariki ya 8 Mata 2026, ritahwa n’Umwepiskopi wa Diyosezi ya Kabgayi, Musenyeri Balthazar Ntivuguruzwa akaba ari nawe wazanye igitekerezo cyo kurishinga mu rwego rwo gusigasira umurage w’amateka ahuza Diyosezi ya Kabgayi n’umuziki.
Musenyeri Balthazar Ntivuguruzwa yagaragaje ko ifungurwa ry’iri shuri ari inzozi zibaye impamo, ashimira abapadiri, abarimu, ababyeyi n’abandi batumye ibyari icyifuzo biba impamo.
Umwepiskopi wa Diyosezi Gatolika ya Kabgayi yavuze ko ishuri rya Kabgayi Music School riri muri gahunda ngari ya Diyosezi yo guteza imbere umuzika nyobokamana n’umuziki nyarwanda.
Ati “Iki gikorwa ni intambwe ikomeye igaragaza icyerekezo cya Diyosezi ya Kabgayi cyo guteza imbere umuziki nyobokamana. Iri shuri rije nk’igisubizo ku cyifuzo cyo kurushaho kunoza umuziki wa Liturujiya. Ahantu ho kwigira gukuza impano no gutoza abakorera Imana bifashishije umuziki.”
Yavuze ko iri shuri rizafasha abana kuvumbura no guteza imbere impano zabo, bigishwe umuziki no gukorera Imana bifashishije umuziki.
Ati “Turifuza amakorari meza; abacuranzi bafite ubuhanga. Abayobozi b’amakorari bafite ubumenyi bwo kuyobora amakorari; ibi byose iri shuri rizadufasha kubigeraho.”
Umwepiskopi wa Diyosezi ya Kabgayi, Musenyeri Balthazar Ntivuguruzwa, yasabye abana batangiye kwiga gukoresha neza amahirwe bahawe bakiga neza.
MUGIRANEZA THIERRY/ UBUREZI.RW
