Ishuri Saint Ignace MUGINA TSS ryizihije umunsi mukuru waryo, hatahwa “studio” igezweho y’Ishami rya Multimedia Production.
Ni ibirori byabaye kuri uyu wa 23 Gicurasi 2026 bibera ku cyicaro cy’iri shuri riherereye mu murenge wa Mugina, akarere ka Kamonyi, Diyosezi Gatolika ya Kabgayi.
Ni ibirori byabanjirijwe n’igikorwa cyayobowe n’umwepisikopi wa diyosezi ya Kabgayi, Musenyeri Balthazar NTIVUGURUZWA, cyo guha umugisha “studio” y’ishami rya Multimedia Production rizatangirana n’umwaka utaha w’amashuri. Igizwe naho bafatira amashusho n’amajwi, aho atunganyirizwa n’icyumba cya mudasobwa (computer lab).
Hakurikiyeho igitambo cya misa cyatuwe na Musenyeri Baltazar NTIVUGURUZWA, Umwepiskopi wa Kabgayi cyo kwizihiza umunsi mukuru wa Saint Ignace MUGINA TSS cyatangiwemo amasakaramentu y’ibanze ku banyeshuri batatu.
Mu nyigisho ye ari gutura iki gitambo, Umwepiskopi yashimiye ishuri rya Saint Ignace MUGINA TSS ryatangiye ari “akabuto gato”, ubu rikaba rimaze gukura. Yashimiye ababigiramo uruhare ari abayobozi n’abarezi baryo, ari n’abagiraneza barifasha.
Yasabye abanyeshuri kwirinda ibigare no kurarikira iby’isi, asobanura ko ibishashagira n’ibiryohera byose atari ko ari byiza. Ashingiye ku Ivanjili yabasabye “kumenya kwicara”, bagategura ibyo bateganya gukora, nk’uko ugiye kubaka inzu abanza kwicara akareba ibyo azakenera.
Musenyeri Baltazar NTIVUGURUZWA yabasabye kwirinda kwihuta ngo bakore ibyo batateguye, bityo bakazagira ejo heza hazaza. Yababwiye ko hazababera heza ari uko bashyize Yezu imbere muri byose, ati “if Jesus is always number one”. Asubiramo amagambo abiri ya Mutagatifu Inyasi wa Loyola.
Agira ati “Guhora baharanira icyiza kurushaho” (Semper magis). Niba ubonye amanota 70% kuki ubutaha utabona 80%? Kuba abaharanira gusa ikuzo ry’Imana mu myuga yabo no mu byo biga (Ad majorem Dei Gloriam).”
Padiri MAJYAMBERE Félix uyobora St Ignace MUGINA TSS yavuze ko hizihizwa imyaka 10 ribaye ishuri ry’imyuga n’ubumenyingiro TVET mu gihe ryatangiye mu wa 1974 ryitwa CARA (Centre d’Animation Rurale et Artisanale). Aho yashimiye abanyeshuri ubwitonzi no gutsinda bibaranga, dore ko ntawe uratsindwa ikizamini cya Leta.
Uhagarariye ababyeyi barerera muri Saint Ignace MUGINA TSS, HABIMANA Elie, yashimye iri shuri ku burere ritanga, avuga ko atari ikigo nk’uko ibindi bivugwa, ahubwo ari urugo, anashima ubufatanye biturukaho buranga Kiliziya, Leta, abarezi, ababyeyi n’abandi bafatanyabikorwa.
Umunyamabanga Nshingwabikorwa w’Umurenge wa Mugina, Munyakazi Epimaque yashimiye ishuri St Ignace MUGINA TSS ko riri neza mu cyerekezo cy’igihugu cyo gutoza imyuga, asobanura ko abayiga ari bo barusha abandi amahirwe ku isoko ry’umurimo, anashima ubupfura ritoza abanyeshuri baryo.
Mu ijambo risoza ibirori by’umunsi mukuru wa St Ignace MUGINA TSS, Myr Balthazar yashimiye abanyeshuri ubwitonzi, umucyo (smartness) n’ubuhanga bibaranga.
Ati “Nimukomereze aho”. Yasobanuriye ababyeyi ko nk’uko byavuzwe ishuri gatolika nk’uko byavuzwe ari urugo atari ikigo.
Yongeyeho ati “Ni aho abana biga bagafata, bagatozwa ubufatanye n’izindi ndangagaciro.” Yashimiye kandi abashinze iryo shuri n’abakomeza kuryitaho, rikaba rimaze gutera intambwe ikomeye kuva kuri CARA muri 1974, kugera kuri TSS ifite inyubako nziza n’amashami 4, initegura no gutangiza andi.
Yashimiye ubuyobozi bw’ishuri, abarezi, ababyeyi, inzego za Leta, abandi bafatanyabikorwa n’abatanze ubutumwa bw’umunsi. Yabwiye abanyeshuri bavuze ko bamukunda ko na we abakunda, abaha izimano bazasangira, yibutsa ko impera z’umwaka w’amashuri zegereje, abifuriza gutsinda.
Abanyeshuri batatu ba Saint Ignace MUGINA TSS bahawe amasakaramentu y’ibanze, Batisimu, Ugukomeza n’Ukaristiya.
UBUREZI.RW
