Mu ishuri rikuru ry’imyuga n’ubumenyingiro, koleji ya Kigali “RP Kigali” hafunguwe porogaramu zigisha iby’indege n’imicungire y’ibibuga byazo, ryitezweho gutanga ubumenyi bukenewe no kongera ubushobozi bw’imbere mu gihugu kugira ngo urwego rw’indege rubashe gukomeza gutera imbere.
Kuri uyu wa Gatatu tariki ya 25 Werurwe 2026, nibwo kuri RP Kigali hafungurwaga iyi gahunda nshya mu muhango witabiriwe n’abayobozi bakuru mu nzego z’igihugu.
Iyi porogaramu zitezweho gutanga umusanzu mu gushaka abakozi bakenewe mu gihe u Rwanda rukomeje kwiyubaka nk’ihuriro ku rwego rw’akarere mu bijyanye n’ubwikorezi bwo mu kirere no gushora imari mu mishinga minini nk’Ikibuga Mpuzamahanga cy’Indege cya Kigali giherereye mu Karere ka Bugesera.
Mu gutangiza iyi porogaramu hamuritswe icyumba cy’imyitozo cy’ikoranabuhanga kiberamo ibikorwa nk’ibibera ku kibuga cy’indege (Airport Simulator Workshop) hamwe n’Ishuri rigezweho (Smart Classroom), byose bigamije gutyaza abazaba biga ibijyanye n’indege.
Binyuze muri aya masomo, abanyeshuri bazahabwa ubumenyi bufatika bubategura neza mu kazi mu bijyanye n’imikorere y’ibibuga by’indege, serivisi z’indege, ibikorwa bijyaye n’ubwikorezi bw’ibintu n’imicungire y’uruhererekane rw’ibicuruzwa.
Umuyobozi Mukuru w’Ishuri Rikuru ry’Imyuga n’Ubumenyingiro (RP), Dr. Sylvie Mucyo yagaragaje ko ibikoresho bishya bizajya byagaragajwe bizatuma abanyeshuri bashyira mu bikorwa ibyo biga kandi bakarangiza bafite ubumenyi busabwa mu kazi.
Umunyamabanga wa Leta muri Minisiteri y’Uburezi, Irere Claudette, yagaragaje ko aya masomo aje mu gihe inzego nk’ubwikorezi bwo mu kirere, ubwikorezi bw’ibicuruzwa n’ubukerarugendo zikomeje kwaguka mu Rwanda.
Ati “Inshingano zacu ni ukureba ko urubyiruko rwacu rwiteguye kubyaza ayo mahirwe umusaruro.”
Muri Gahunda ya Kabiri y’Igihugu yo Kwihutisha Iterambere, (NST2), Guverinoma y’u Rwanda ivuga ko hazashyirwaho ikigo gishinzwe kongerera ubumenyi n’ubushobozi
abakora mu by’indege kizafasha mu gutanga ubumenyi bukenewe no kongera ubushobozi bw’imbere mu gihugu kugira ngo urwego rw’indege rubashe gukomeza gutera imbere.
MUGIRANEZA Thierry/UBUREZI.RW
