Urwunge rw’amashuri rwaragijwe Bikira Mariya Umwamikazi i Rwaza mu karere ka Musanze rwizihije umunsi mukuru w’irishuri mu birori byo kwizihiza Bikira Mariya Umwamikazi waragijwe iri shuri(Marie Reine).
Ibi birori byabaye kuri uyu wa Gatanu tariki 22 Gicurasi 2026, aho Groupe Scolaire Marie Reine Rwaza yizihije umunsi mukuru wayo ngarukamwaka.
Ni birori byabimburiwe ‘igitambo cya Misa yayobowe na Nyiricyubahiro Myr Visenti HAROLIMANA umwepisikopi wa diyosezi Ruhengeri.
Ni misa yatangiwemo isakramentu ry’Ugukomezwa ku banyeshuri 26 babyigiye.
Ubuyobozi bwa Groupe Scolaire Marie Reine Rwaza bwasabwe kurushaho gukomera kuri Bikira Mariya.
Umuyobozi w’ishuri rya GS Marie Reine Rwaza, Padri Révérien TURIKUMWENAYO yashimiye abaje kwifatanya nabo muri ibi birori, avuga ko bigaragaza icyimenyetso cy’urukundo, ubufatanye n’inyota yo gukomeza guteza imbere uburezi n’uburere bwizihiye kiliziya.
Ashima ubufatanye bw’abarezi, ababyeyi n’ubuyobozi bwiza, mu rwego rwo gukomeza guteza imbere uburezi n’uburere muri iri shuri ryaragijwe bikira mariya.
Ati “Guhera mu mwaka wa 1986 ibitekerezo byiza by’ababyeyi byakiriwe na kiliziya ndetse n’ubu kiliziya yishimira umuganda wayo mu kurera neza, umwana agakura neza, agakora neza bityo akazavamo umuntu wuzuye kandi ushoboye ndetse ushobotse.”
Padri Révérien TURIKUMWENAYO yavuze ko bazakomeza guteza imbere uburezi n’uburere butangirwa muri iri shuri badasize no guteza imbere impano mu mikino itandukanye. Yashimangiye ko bazakomeza gushyira imbaraga mu gutanga uburezi bw’indashyikirwa no kuba igicumbi cy’uburezi bushimwa na buri wese kandi bagakomeza kurerera neza u Rwanda na kiliziya.
Umwepisikopi wa Diyosezi Ruhengeri, Nyiricyubahiro Musenyeri Visenti HAROLIMANA yasabye abitabiriye ibi birori gukomeza kwimakaza indangagaciro ziranga umwana warezwe neza zirimo urukundo, ubumwe, ukwemera ndetse no gukorera hamwe.
Nyiricyubahiro Musenyeri Visenti HAROLIMANA yashimangiye ko Bikira Mariya ari urugero rwiza rw’ubwiyoroshye, kumvira no kwizera Imana, asaba abanyeshuri n’abarezi gukomeza kumwigiraho.
Umuyobozi w’akarere ka Musanze wungirije Ushinzwe Imibereho Myiza y’Abaturage, Theobald Kayiranga ni umwe mu bayobozi bifatanyije n’Umwepiskopi wa Diyosezi Ruhengeri mu biroro byo kwizihiza umunsi mukuru wa Groupe Scolaire Marie Reine Rwaza.
Visi Meya Theobald Kayiranga yashimye uruhare rwa Kiliziya Gatolika mu guteza imbere uburezi, asaba abanyeshuri kwigana umwete no kurangwa n’ikinyabupfura.
UBUREZI.RW
